Það eru innan við fjórir mánuðir þangað til gengið verður til þingkosninga á Íslandi. Nú um áramótin velta menn sér upp úr atburðum liðins árs – sjálfum finnst mér það ekkert sérlega áhugavert eða skemmtilegt – það er meira spennandi að reyna að ráða í framtíðina.

Eins og staðan er núna ætti Sjálfstæðisflokkurinn að vera að búa sig undir að taka við stjórnartaumunum í vor.

Horfurnar á að hann nái að mynda tveggja flokka stjórn með Framsóknarflokknum eru reyndar ekki miklar. Líklegt er að eina tveggja flokka stjórnin sem er í spilunum sé ríkisstjórn Sjálfstæðisflokksins og Samfylkingarinnar – það verður meira að segja að teljast nokkuð sennileg niðurstaða. Ýmsir í Samfylkingunni virðast vera sáttir við þá niðurstöðu, eftir að flokkurinn hefur sýnt vinstri vangann síðustu fjögur árin. En andstaðan er vissulega fyrir hendi, rétt eins og öfl innan Sjálfstæðisflokksins myndu berjast hatrammlega gegn því að slík stjórn liti dagsins ljós.

Annar möguleiki er þriggja flokka stjórn – þá hugsanlega Sjálfstæðisflokks, Framsóknar og Betri framtíðar, ef sá flokkur nær mönnum inn á þing eins og flest bendir til. Björt framtíð virðist vera til í tuskið – bæði til hægri og vinstri.

Það einfaldar lífið nokkuð fyrir fjórflokkinn að ný framboð eru ekki að sýna mikinn styrk. Eftir brotthvarf Lilju sýnist manni að Samstaða eigi varla neina framtíð – og það virðist hæpið að Dögun eða Hægri grænir nái mönnum inn á þing. Og botninn gæti auðvitað dottið úr Bjartri framtíð – frambjóðendur flokksins eiga enn eftir að sýna hvað í þeim býr, en viðtal við frambjóðandann í fyrsta sæti flokksins í Reykjavík norður á útvarpi Sögu fyrir jól þótti ekki gott.

Frekar ólíklegur möguleiki er að núverandi stjórnarflokkar nái að halda velli í ríkisstjórn. Allt stefnir í slíkt tap hjá þeim að hugsanlega þyrftu þeir að bæta tveimur flokkum inn í stjórnina hjá sér til að halda áfram, Framsókn þá líklega og Bjartri framtíð. Það er heldur ólíklegt að hægt yrði að mynda slíka ríkisstjórn.

Það gæti orðið tafsamt að mynda ríkisstjórn í vor – en það er langlíklegast að Bjarni Benediktsson verði forsætisráðherra eins og horfurnar eru núna, við áramótin.

Hér má sjá áramótaboðskap forsætisráðherraefnisins Bjarna Ben.