Sænski handboltarisinn síðhærði Staffan Olsson var sérstakur óvinur Íslendinga á árunum þegar sænska landsliðið vann alltaf það íslenska. Það var sama á hverju gekk, alltaf skyldu Svíarnir hafa sigur. Þeir virkuðu líka óþolandi montnir með sín sænsku hvatningarhróp um grabbar og killar.
Þegar Íslendingar unnu loks sigur á Svíum um daginn birtu margir þessa mynd á Facebook, hún sýnir moðfúlan Olsson (hann var reyndar nefndur Faxi á sinni tíð af gamansömum íslenskum íþróttafréttamönnum) þegar Svíar voru að tapa fyrir Íslendingum um daginn. Undir birtust alls kyns háðsglósur um Olsson. Hann er nú þjálfari sænska liðsins.
En það er einhvern veginn þannig með Svía að það er aldrei hægt að bóka sigur yfir þeim. Nú eru Íslendingar dottnir úr keppninni á Ólympíuleikunum, en Svíar leika um gullverðlaunin gegn Frökkum á morgun.
Staffan Olsson er ansi sigursæll íþróttamaður. Hann hefur leikið 357 landsleiki, tvívegis orðið heimsmeistari í handbolta, fjórum sinnum Evrópumeistari og hann hefur þrívegis unnið silfurverðlaun á Ólympíuleikum. Hann bætir öðrum verðlaunapeningi í safnið á morgun, hvort sem það verður gull eða silfur. Íslenskum handboltaáhugamönnum er fremur í nöp við „Faxa“, eins og fyndnir íþróttafréttamenn nefndu hann.
