Sérstakur Íslandsvinur heitir Daniel Hannan. Hann hefur túlkað íslenskar bókmenntir á þann veg að Sjálfstætt fólk fjalli um sérstaka frjálsræðishetju, Bjart í Sumarhúsum, sem sé afar góð fyrirmynd.

Hannan fór í fyrirlestraferð um Bandaríkin og komst inn á margar sjónvarpsstöðvar ysta hægrisins. Boðskapur hans var sá að breska heilbrigðiskerfið, NHS, væri argasti kommúnismi. Þetta féll vel í kramið víða í Bandaríkjunum og vegur Hannans er mikill í ákveðnum kreðsum þar.

Það var gaman að sjá að eitt atriði hinnar frábæru opnunarhátiðar Ólympíuleikanna í London var einmitt tileinkað National Health Service – og það á tíma íhaldsstjórnar – þeirri stórmerku stofnun sem byggir á því fyrirheiti að allir skuli eiga jafnan aðgang að heilbrigðisþjónustu, burtséð frá stétt, stöðu og efnahag. Það er ekki hægt að lýsa því hversu þetta var mikilvægt þegar NHS leit dagsins ljós eftir heimstyrjöldina.