Ég skrifaði þennan pistil eftir að hafa farið í Whole Foods Market í New York í apríl í fyrra. Nú segir að þessi verslanakeðja ætli að hætta að „kynna“ íslenskar vörur vegna hvalveiða. Það er raunar nokkuð óljóst hvað felst í þessari hótun.

— — —

Whole Foods Market hér niðurfrá í Chelsea er flottasta matvörubúð sem ég hef komið í.

Allt ferskt, lífrænt og frábært. Mann langar að kaupa í stóra körfu og fara með heim.

Grænmetið og ávextirnir ilma af ferskleika. Við kjötborðið eru eftirfarandi reglur:

Allt sláturfé skal meðhöndlað á mannúðlegan hátt. Ekkert frosið, engin aukaefni. Hænsnfé á að hafa hlaupið um frjálst og hafa verið alið á kornmeti.

Í búðinni er líka að finna íslenskar landbúnaðarvörur.

Hið góða íslenska smjör. Samt ekki á alveg nógu áberandi stað.

Og skyr frá Mjólkursamsölunni (með nokkuð miklum sykri) og frá Sigga sem er ungur íslenskur athafnamaður, búsettur í New York.