Það eru frábær tíðindi að Sigrún Davíðsdóttir skuli ætla að leggja okkur lið hér á Eyjunni.

Fyrsti pistill hennar sem birtist í dag er mjög upplýsandi, fjallar meðal annars um skuldsettar yfirtökur. Þeim er lýst svona:

„Fæstir áttuðu sig á því þá – en við vitum það núna – að líkt og á við um svo mörg önnur fyrirtæki á skuldsetta rólinu snerist gæfa Baugs sumarið 2007. Blekið var varla þornað á samningnum um kaup Baugs á Keops, danska fasteignafélaginu, þegar Evrópski seðlabankinn hóf að dæla fé út í fjármálakerfið til að hamla móti lausafjárkreppunni. Þetta var merki um að allar lánalindir voru að þorna – og eftir á að hyggja var þetta líka merki um að dagar skuldsettrar yfirtöku væru liðnir.

Keops-kaupin voru skólabókardæmi um viðskiptahætti sem þá þóttu – ja, ef ekki fínir þá alla vega viðunandi. Glitnir lánaði til að brúa yfirtökuna. Eigendur Keops fengu greitt með hlutabréfum í Stoðum sem formlega var kaupandinn – en saman áttu Fons, eignarhaldsfélag Pálma Haraldssonar, og Baugur þegar rúm 60 prósent í Keops sem hafði skilað eigendum háum arðgreiðslum. En undir nýjum kringumstæðum sem sköpuðust sumarið 2007 urðu engir peningar til að borga skuldina.

Skuldsett yfirtaka, eins og Baugsmenn, líkt og margir aðrir, hafa tíðkað hana, er í raun herleiðing fyrirtæksins sem tekið er yfir. Það er ekki verið að taka lán til að efla reksturinn heldur til að ná út fé í næstu aðgerð. Fyrirtækið er skuldsett upp í skorstein, skilið eftir riðandi undan skuldabagganum en peningarnir eru greiddir út í arð eða teknir út á annan hátt. Allt sem svona fyrirtæki selur þarf að hækka í verði til að standa undir skuldabagganum. Eins og einn endurskoðandi lýsti þessu: yfirteknu fyrirtækin eru stofnuð á barmi gjaldþrots.“

Pistilinn má lesa í heild sinni hér.