”Einnig væri líklegt að fjármagnseigendur flyttu fjármagn sitt annað.”

Þetta er óbreytt setning upp úr ávarpi formanns Viðskiptaráðs og forstjóra Exista.

Forystumanns í íslensku útrásinni. Hann telur semsagt að nú muni efnafólk fara að færa fé sitt burt – kannski í skattaskjól?

En Jóhanna hafði þetta að segja:

„Ég hef haldið því fram og ég ítreka það hér að viðskiptalífið hér á landi og víða annars staðar, sleit sig úr siðferðilegu sambandi við þjóðina. Fyrir það blæðir almenningur nú þegar á fjórtanda þúsund manna ganga atvinnulausir og gríðarlegir fjármunir hafa tapast hjá einstaklingum og fyrirtækjum,“ sagði Jóhanna.

Þá má benda á þessa Morgunblaðsfrétt frá því fyrir þremur árum:

Fimmtudaginn 22. júní, 2006 – Viðskiptablað
Farið að tillögum Viðskiptaráðs í 90% tilvika

ATHUGUN Viðskiptaráðs á afgreiðslu frumvarpa Alþingis á síðasta starfsári hefur leitt í ljós að Alþingi fór í 90% tilfella að hluta eða öllu leyti eftir tilmælum ráðsins, sem lögð voru fram í athugasemdum með frumvörpunum. Á starfsárinu urðu 119 mál að frumvarpi til laga, af 234 sem lögð voru fram, að því er segir á vef Viðskiptaráðs.

Og þessa ársgömlu skýrslu Viðskiptaráðs um samkeppnishæfni Íslands:

„Viðskiptaráð leggur til að Ísland hætti að bera sig saman við Norðurlöndin enda stöndum við þeim framar á flestum sviðum. Ísland ætti þess í stað að bera sig saman við þau ríki sem standa hvað fremst á hverju sviði fyrir sig“ (bls. 22)