Ég benti á það um daginn að Íslendingar hefðu engan áhuga á efni Búkarestsfundar Nató, einungis á hugsanlegum flottræfilshætti ráðherra sem fóru þangað.
Það hefur sannast rækilega.
Örn Arnarson skrifar merkilega fréttaskýringu um fundinn á vef Viðskiptablaðsins.
Hann bendir á að á fundinum hafi Natóríkin samþykkt fyrirætlanir Bandaríkjanna um eldflaugavarnakerfi í Evrópu.
Það þýðir að íslenski forsætisráðherrann og utanríkisráðherrann hafa lýst stuðningi við þessar fyrirætlanir. Í Nató er ekkert sem heitir að sitja hjá; annað hvort eru öll ríkin með eða ekki.
Hér á landi hefur samt ekki farið fram nein umræða um varnarviðbúnað af þessu tagi eins og Örn bendir á.
En þetta hlýtur samt að þýða að Ísland verði með í þessu varnakerfi – og þá hugsanlega að settur verði upp búnaður sem tengist því á landinu.
Björn Bjarnason skrifar um þetta á vef sinn í dag og segir að málið kunni að verða viðkvæmt í Noregi þar sem SF, systurflokkur Vinstri grænna situr í ríkisstjórn.
Björn er stundum svolítið lúmskur í skrifum sínum. Hann nefnir ekki að málið kunni að verða erfitt fyrir Samfylkinguna – en gæti það ekki orðið það?
