Athyglisvert. Lesið hér:

„Nú er orðið ljóst að á matvælamarkaðinum er Bónus í raun orðin dýr verslun miðað við það sem áður var og í samanburði við nágrannalöndin, þó svo að í Bónusi sé samt boðið upp á lægsta vöruverð á landinu, en það er að yfirlögðu ráði markaðsráðandi afla, Baugs (Hagkaup, Bónus og 10-11) og Kaupáss (Nóatún, Krónan og 11-11). Sannkallað neyðarbrauð.

Alvarlegar tilraunir hafa verið gerðar til að keppa á matvælamarkaðinum, Europris, sem hefur horfið frá því að vera matvöruverslun og selur núna einkum annan varning. Hver skyldi vera ástæðan? Jú, heildsalar og einkum þó framleiðendur þorðu nefnilega ekki að bjóða þessum fyrirtækjum góð kjör af ótta við refsingu frá hinum sterku markaðsráðandi öflum. Þetta vita margir en hafa ekki hátt um það.

Þegar Bónusverslanirnar hófu starfsemi sína nutu þær aðstoðar heildsala og framleiðenda vegna ótta þeirra við stærð og yfirgang Hagkaupa. Eftir að þessi tvö fyrirtæki sameinuðust síðan í hlutfallslega stærsta matvælafyrirtæki í hinum vestræna heimi þá neyddust heildsalar, og þó sérstaklega framleiðendur, til að veita Baugi óeðlilega háan afslátt á kostnað smærri kaupmanna. Þetta tvennt, hærra innkaupsverð smærri verslana og undirverðlagning hinna stærri varð mörgum kaupmönnum um megn og þeir urðu að loka verslunum sínum. Síðan hafa margir bóksalar og apótek hlotið sömu örlög og nú er grænmetis-, ávaxta- og blómasala í uppnámi.

Núna tólf árum síðar má sjá hvílíku tjóni þessar hringamyndanir Baugs hafa
valdið, m.a. einokun í formi fákeppni á matvælamarkaðinum, þar sem hvorki hagstætt gengi íslensku krónunnar né hagræðing stærðarinnar skilar sér nema að örlitlu leyti til íslenskra neytenda, sem greiða hæsta matvöruverð í hinum vestræna heimi.“