Það finnst mér stórkostlegt að Kolbeinn Jón Ketilsson skuli eiga að syngja í gamla leikhúsinu í Epidaurus. Leikhúsið er hreint ólýsanlega fallegt. Það stendur lengst upp í sveit, í skóglendi – þegar kvöldar sjást varla önnur ljós en týrur á nálægum sveitabæjum og stjörnurnar. Leikhúsið er ævafornt, frá fjórðu öld f. Kr.

Ég fór þarna í fyrra og sá Persa eftir fornskáldið Æskýlos. Skildi svosem ekki allt sem sagt var en þetta var mikil upplifun. Leihúsið rúmar 14 þúsund manns og það var troðfullt þetta kvöld. Ég á ekki von á að það verði öðruvísi þegar Kolbeinn syngur í Medeu.

Annars leikur Kolbeinn stórt hlutverk í tónlistaruppeldi Kára. Uppáhaldslag hans lengi vel var Ríðum ríðum – Á Sprengisandi – lag Sigvalda Kaldalóns við ljóð Gríms Thomsen.

Þetta eigum við í tveimur útgáfum. Annars vegar með „mjóu mönnunum“ – Savanna Tríóinu.

Hins vegar með „feita karlinum“. Það er Kolbeinn Jón. Ég veit samt ekki til þess að hann sé feitur, heldur er röddin hans einfaldlega feitari en frekar mjóróma hljóðin í Savanna.

Við getum ekki gert upp á milli hvor útgáfan sé betri.