Við Kári höfum notað Hallgargarðinn mikið alveg síðan hann fæddist. Kári skreið um Hallargarðinn á sínum tíma, en hefur síðustu árin kosið að ganga. Meðal þess sem við notum mikið er lítill sparkvöllur fyrir ofan húsið að Fríkirkjuvegi 11. Þar eru tvö mörk, lítil brekka þar sem vaxa hvannabreiður á sumrin, mjög fallegur steinveggur í kring. Börn eru oft að leika sér þarna.

Nú virðist borgin hafa fallist á að Björgólfur Thor Björgólfsson fái að leggja einhvers konar viðhafnarheimreið upp að húsinu. Á mannamáli þýðir þetta að gera eigi akveg í gegnum þennan fallega garð. Líklega til að gestir Björgólfs þurfi ekki að ganga alla leið frá Fríkirkjuveginum.

Björgólfi á líka að afhenda fjórum sinnum stærri hluta lóðarinnar en ráðgert var þegar hann fékk að kaupa húsið. Sparkvöllurinn góði á að verða bílastæði.

Nema hvað?

Þetta er vond hugmynd. Rétt eins og það var vond hugmynd á sínum tíma að selja Björgólfi húsið. Það hefði verið hægt að gera svo ótalmarga skemmtilegri hluti við það en að leyfa honum að breyta þessu í monthús í kringum sjálfan sig.

Í sumar fórum við Kári til dæmis á skemmtilegt safn í London sem heitir Museum of Childhood – einhver slík starfsemi hefði verið til prýði í þessu fallega húsi og garði.