Það verður spennandi að sjá hvaða brautargengi frumvarp sautján þingmanna um aukið frelsi í áfengisverslun hlýtur í þinginu. Eins og sjá má í athugasemdum hér á síðunni er málið býsna umdeilt. Um það ríkir heldur ekki einhugur í neinum stjórnmálaflokki – helst að manni detti í hug að Vinstri græn ætli öll að vera á móti.

Í Sjálfstæðisflokknum eru líka skiptar skoðanir eins og sjá má á eftirfarandi bloggfærslu Björns Bjarnasonar:

„Mér heyrðist ágætur flokksbróðir minn og samþingmaður, Sigurður Kári Kristjánsson, rökstyðja aukið aðgengi að áfengi í verslunum á þann veg, að hér verði til einhver Miðjarðarhafsdrykkjumenning við breytingu í þá átt. Þessi rök voru notuð við breytingar á áfengislöggjöf í Bretlandi fyrir fáeinum árum. Allir virðast nú á einu máli um, að þar hafi drykkjumenning síður en svo færst í átt að Miðjarðarhafi. Drykkjuvandamál hafi stóraukist með auknu aðgengi og stórefla þurfi löggæslu og meðferðarúrræði til að bregðast við þeim.“