Borgarminjavörður mun sjálfsagt berjast gegn því að hús verði flutt úr Árbæjarsafni. En þá er á það að líta að þegar húsin voru flutt þangað uppeftir voru aðrir tímar og önnur viðhorf.

Nú myndi vonandi enginn láta sér detta í hug að flytja hús eins og Lækjargötu 4 upp í Árbæ. Svona hús eiga heldur ekki heima þar. Í Árbæjarsafni er um að litast eins og maður sé kominn upp í sveit – gamli bærinn í Árbæ er þar hið eðlilega byggingarform.

Húsin sem voru flutt þangað síðar – eins og Lækjargata 4 – eru hins vegar borgarhús og eiga heima í borgarumhverfi. Þegar ég var strákur var Hagkaupsverslun í húsinu – þar voru meðal annars seldir hinir frægu Hagkaupssloppar.

Árbæjarsafn er fallegt og skemmtilegt, en því miður varð það eins og ruslakista fyrir hús sem borgaryfirvöld kærðu sig ekki um að hafa í bænum. Nú dauðsjá menn eftir því að hafa látið þessi hús fara.