Ég hef ekki legið á þeirri skoðun minni að húsin sem stendur til að rífa neðst á Laugaveginum séu lítils virði.

En það spurning hvað kemur í staðinn.

Óskar Jónasson skrifar í Fréttablaðið í dag og segist hafa séð tillögur að byggingunni sem þarna á að rísa, fjögurra hæða verslunarhúsi og hóteli.

Óskar segir að þetta hafi litið út eins og stafli af örbylgjuofnum.

Á öðrum stað í blaðinu segir að blaðamaður Fréttablaðsins hafi ekki getað fengið teikningarnar af húsinu því þær verði ekki „opinber gögn fyrr en eftir að byggingarfulltrúi hefur samþykkt þær“.

Er þetta ekki eitthvað öfugsnúið? Væri ekki sniðugra að borgararnir fengju að sjá – og dæma?

— — —

Sjálfur hef ég verið að leggja til að sett verði mjög ströng skilyrði um hvernig hús fái að rísa í gömlum hverfum bæjarins. Það er ekki bara Miðbærinn sem er viðkvæmur, heldur líka hverfi í Skólavörðuholti og Vesturbænum.

Ef til vill væri ráð að þróa þessa umræðu áfram? Við getum ekki látið kerfisfólk og verktaka ráða þessu.

Hvað segja menn til dæmis um að halda stóra ráðstefnu um byggingarlistina í Reykjavík strax í haust og reyna þá að hefja þá umræðuna upp fyrir rifrildið og skotgrafinar?