Það sem skiptir aðalmáli er ekki endilega hvort eigi að rífa húsin heldur hvað eigi að koma í staðinn. Það hafa ekki komið nein almennileg svör við því. Nýbyggingar við Laugaveginn eru flestar hörmulega ljótar. Teikningar af húsum sem er ráðgert að reisa við götuna – til dæmis á reitnum Laugavegur 33-35 – eru hrikalegar.

Hér má sjá teikningu af byggingunni sem er fyrirhuguð þar:

Meðan hugmyndirnar er svona er best að rífa sem minnst. Þarna standa að minnsta kosti þrjú hús – misvel farin að sönnu – en verður nú eitt samfellt ferlíki. Það er ódýrara að byggja svoleiðis. En þetta eru teikningar sem borgaryfirvöld geta ekki samþykkt. Það jafngildir því að gefa miðborginni fingurinn.

Við getum ekki afhent verktökum sjálfdæmi um hvernig Laugavegurinn á að líta út.

Svo þarf að setja reglur um hvaða kröfur hús á þessu svæði þurfa að uppfylla – þá ekki síst með tilliti til fagurfræði.