Rithöfundurinn Tanith Carey segir frá því að allar ungar konur og stelpur ættu að sjá nýja mynd af samfélagsmiðlastjörnunni Kylie Jenner í skoðanapistli á Fabulous Digital. Á myndinni er raunveruleikastjarnan ómáluð í kósýgallanum með hárið í tagli.

„Ég var örugglega ekki sú eina þegar ég hugsaði: „Hver er þetta?“ þegar ég sá þessa mynd […] Hún lítur út eins og við flest þessa dagana. Þannig þegar ég las að þetta væri engin önnur en snyrtivörumógullinn og milljarðamæringurinn Kylie Jenner varð ég kjaftstopp,“ segir Tanith.

„Ekki bara því þessi 22 ára kona er að segja 171 milljón fylgjendum sínum að halda sig heima, heldur einnig því það leit út fyrir að einhver hafði komið í staðinn fyrir stærstu samfélagsmiðlastjörnu heims. Stóru varirnar og augnhárin voru horfin ásamt spegilsléttu húðinni og háu kinnbeinunum sem við erum vön að sjá á Instagram-síðunni hennar. Í stað hennar var fullkomlega falleg stelpa, stelpa líkt og þær sem við erum vön að sjá á hverjum degi.“

Tanith segir að þetta snúist ekki um að „ná stjörnu ómálaðri“ til þess að lítillækka hana.

„Sem móðir tveggja unglingsstúlkna tel ég ungar stúlkur mega læra margt af þessari mynd af Kylie Jenner […] Ég sýndi 15 ára dóttur minni myndina og fékk hana til að hugsa um það að það sem hún sér á samfélagsmiðlum endurspeglar ekki raunveruleikann. Að mínu mati er sú lexía jafn mikilvæg og hver önnur,“ segir Tanith.

„Hún er ennþá sæt, en myndin er áminning að „Insta-andlit“ Kylie er fengið með aðstoð frá snyrtivörum, lýsingu og filterum. Hún hefur byggt stórveldi sitt á útliti sínu.“

Tanith segir vandamálið vera að Kylie hefur gert sig sjálfa að söluvöru og áhrifagjarnar ungar stúlkur hafa reynt að feta í hennar fótspor.

„Það þýðir að dætur okkar eyða dýrmætum tíma í að reyna að líta út eins og Kylie, þegar Kylie lítur ekki einu sinni út eins og Kylie.“

Þú getur lesið greinina í heild sinni hér.