Orðrómur er á kreiki þess efnis að Bjarni Benediktsson fjármálaráðherra vilji hætta alfarið í stjórnmálum. Þessu vísar Bjarni á bug en við á DV ákváðum samt sem áður að leggja fyrir hann tarotspil til að sjá hvað framtíðin ber í skauti sér. Lesendur dv.is geta gert slíkt hið sama á vefnum.
Fyrsta spilið sem kemur upp er 10 sverð en það segir mikið um þann félagsskap sem Bjarni er í í stjórnmálum. Mikil ólga hefur verið innan Sjálfstæðisflokksins og hefur Bjarni það á tilfinningunni að þessar deilur skemmi fyrir honum. Hann vill hörfa sem allra fyrst því hann vill ekki stjórna búi sem er tvístrað. Bjarni þarf að treysta á innsæið og hjartað en spilið merkir að erfiðir tímar séu á bak og burt og nýr kafli að hefjast – utan Sjálfstæðisflokksins.
Næsta spil sem kemur upp er 9 mynt, sem lýsir að einhverju leyti persónuleika Bjarna. Hann er félagslyndur en að sama skapi kýs hann stundum að vera einn með sjálfum sér. Hann er þó aldrei einmana og nær að finna frið í rólegheitum og friði. Hann hefur hins vegar ekki náð að njóta margs upp á síðkastið. Hann er búinn að leggja á sig ómælda erfiðsvinnu til að ná langt í pólitík og hann hefur áhyggjur af því að framhaldið á nýjum vettvangi verði ekki jafn gott. Það eru óþarfa áhyggjur. Þegar að Bjarni segir skilið við stjórnmálin fær hann fína vinnu og einkennir fjárhagslegt öryggi framtíð hans.
Svo er það Myntásinn. Það spil sýnir að Bjarni fer inn á allt aðra braut þegar kemur að vinnunni, jafnvel andlega braut. Hann vill hjálpa öðrum og hugsanlega gæti einhvers konar hjálparstarf kallað á pólitíkusinn. Það sem mestu máli skiptir er að Bjarni hlusti á það sem hann sjálfur vill, ekki það sem búist er við af honum.
