Tinna Miljevic er nýráðinn samfélagsmiðlasérfræðingur þjóðkirkjunnar. 

„Ég sótti á dögunum um starf sem er mér kært. Fór í gegnum umsóknarferlið og mér til mikillar undrunar fékk ég starfið. Ég hef störf 1.febrúar sem samfélagsmiðla sérfræðingur Þjóðkirkjunnar og er ótrúlega spennt. Á sama tíma finn ég hellings söknuð – hann blandast furðulega saman við fiðrildin í maganum. Ég mun sakna ykkar allra, meira en ykkur grunar. Mér þykir þetta erfitt skref þar sem ég byggði litlu Stofuna upp frá grunni og hún bjó okkur Úlfu til öryggið sem við þurftum. Hinsvegar er ég tilbúin og tek fagnandi á móti nýjum áskorunum,“

skrifaði Tinna á Facebook 22. janúar þar sem hún greindi frá nýju vinnunni.

Starf hennar hjá Biskupsstofu gengur út á að finna brú á milli almennings og kirkjunnar og hleypa fólki inn í starfsemina innan kirkjunnar og það gerir hún meðal annars í gegnum samfélagsmiðla.

„Markmið mitt er að fara inn í sem flestar kirkjur með símann á lofti og taka viðtöl við presta og aðra starfsmenn hverrar kirkju. Svo vil ég taka myndir af innviðum kirknanna þannig að fólk geti séð hvernig er umhorfs inni, hvað komast margir fyrir þar, hvernig er aðgengi þannig að fólk geti fengið hugmynd um hvaða kirkja hentar best fyrir athafnir sem það hyggst halda. Þannig vil ég opna kirkjurnar og færa þær nær fólkinu. Hægt er að sjá það sem ég er að vinna með ef fólk fer inn á Instagram og slær inn þjóðkirkjan eða bara kirkjan og þar  inni má finna aragrúa af myndböndum, bæði myndbönd af kirkjum, starfsfólki þeirra og skemmtilegum innslögum af ýmsum toga. Ég læt tónlist hljóma undir þessum myndböndum sem höfða til bæði eldra og yngra fólks,“ segir Tinna við Lifðu núna. Segir hún ferskan blæ hafa borist með nýjum biskupi.