Eftir margra mánaða bið hefur breski Íhaldsflokkurinn valið sér nýjan formann. Nýja formannsins bíður það verkefni að blása nýju lífi í flokkinn sem er ansi veikburða þessa dagana eftir þá útreið sem hann fékk í síðustu þingkosningum.

Nýi formaðurinn heitir Kemi Badenoch og er 44 ára. Hún er stundum kölluð „Frú ekkert kjaftæði“. Hún verður nú leiðtogi stjórnarandstöðunnar og hver veit nema hún verði síðar forsætisráðherra.

Fyrsta verkefni hennar verður að reyna að gera stjórn Verkamannaflokksins lífið leitt og vinna traust kjósenda en þeir hafa greinilega misst alla trú á Verkamannaflokknum eftir margra ára ringulreið og hvert hneykslismálið á fætur öðru. Það skilaði sér í skelfilegri útreið flokksins í þingkosningunum í sumar.

„Það er kominn tími til að byrja að vinna, það er kominn tími endurnýjunar,“ sagði hún á laugardaginn eftir að hún var kjörin formaður flokksins.

Kjör hennar er einnig sögulegt því hún er fyrsti svarti leiðtogi bresks stjórnmálaflokks.

Hún tilheyrir hægri væng flokksins og er sögð vera kona með mjög ákveðnar skoðanir og óhrædd við að tjá sig. Hún hefur verið talskona Brexit frá upphafi.

Stuðningsfólki hennar fellur vel bið beinskeyttan stíl hennar og hversu óhrædd hún er að takast á við viðkvæm mál.

Hún hefur gegnt nokkrum ráðherraembættum, síðast sem atvinnumálaráðherra í stjórn Rishi Sunak.