Brynjar Níelsson, samfélagsrýnir og fyrrum lögmaður og aðstoðarmaður dómsmálaráðherra, rýnir í sjálfan sig og segist lítt brosmildur og stuð og stemning fara í taugarnar á honum.

„Margir eru þeirrar skoðunar að ég sé ekki rétti maðurinn til að vera talsmaður kynþokkans, hvað þá gleðinnar. Örugglega margt til í því en ég vil þó benda á að ég er kominn með þokkalega stór brjóst í seinni tíð og ég er ekki alltaf með krepptan hnefa í vasa þótt ég brosi ekki að óþörfu. Brosmildi er bara ekki í ættinni, einkum karlleggnum, og stuð og stemmning fer eiginlega í taugarnar á okkur,“ segir Brynjar á Facebook-síðu sinni. 

Færslur hans þar eru gjarnan með kaldhæðnum tón og dansar Brynjar á þeirri þunnu línu sem skilur milli húmors og kaldhæðni. Vísar hann með orðum sínum til fyrri færslu sinnar þar sem Brynjar gagnrýndi nýjar auglýsingar flugfélagsins Play.

„En það sem truflar okkur mest er stjórnlyndi, frekja og yfirgangur, sem virðist ágerast í okkar góða samfélagi, og auðvitað alltaf í góðum tilgangi. Munurinn á gömlu góðu Soffíu frænku og sumum Soffíum í dag er að sú gamla var góðmennskan uppmáluð og bar umhyggju fyrir öðrum en nýja Soffía er gjarnan illgjörn og ofstopafull og skeytir hvorki um skömm né heiður til að ná sínu fram.“