Ólympíuleikarnir í París hefjast þann 26. júlí næstkomandi og sjálft Ólympíuþorpið er orðið krökkt af fólki með tilheyrandi mannlífi.

Í gegnum árin hafa gengið háværar sögur um að afreksíþróttafólk heimsins stytti sér stundir í þorpinu með rekkjubrögðum. Til að bregðast við því, segir sagan, þá er aðeins boðið upp á sérstök rúm úr pappa sem sögð eru kynlífsletjandi.

En það er annað þessu tengt sem hefur vakið athygli. Virkni stefnumótaforritsins Grindr, sem er vinsælt meðal samkynhneigðra, er til að mynda verulega takmörkuð í þorpinu.

Ástæðan er sú að á Grindr geta notendur séð staðsetningu hvors annars og vilja skipuleggjendur Ólympíuleikanna tryggja að engum íþróttamönnum, mögulega heimsfrægum, verði sparkað út úr skápnum af fjölmiðlum eða öðrum notendum.

Slíkt hefur átt sér áður stað. Á Ólympíuleikunum í Ríó de Janeiro gekk blaðamaður Daily Beast um þorpið með öll helstu stefnumótaforritin, þar á meðal Grindr, og reyndi að bóka eins mörg stefnumót og viðkomandi var unnt.

Síðan var skrifuð grein, sem vakti mikið umtal, enda var fyrsta útgáfa hennar með persónugreinanlegum upplýsingum um íþróttamennina.

Í París er hins vegar búið að slökkva á þessari virkni, amk á Grindr, og getur enginn Grindr-notandi séð aðra notendur í þorpinu.