Sjónvarpsmaðurinn Andri Már Eggertsson, Nablinn, var gestur í nýjasta þætti af Íþróttavikunni. Helgi Fannar Sigurðsson og Hrafnkell Freyr Ágústsson hafa umsjón með þættinum.

Íslenska kvennalandsliðið kom sér í ansi sterka stöðu í undankeppni EM með því að krækja í fjögur stig, jafntefli úti og sigur heima, gegn Austurríki.

„4 stig á móti Austurríki er bara brilliant og kemur okkur í frábæra stöðu upp á að fara á EM,“ sagði Andri.

Sigurleikurinn hér heima einkenndist af miklu roki en íslenska liðið gerði vel.

„Vindurinn var í stóru hlutverki en mér fannst stelpurnar samt gera vel í fyrri hálfleik á móti vindi. Þær náðu miklu meiri tökum á boltanum og komust fyrir aftan þá. Í seinni hálfleik voru algjörir yfirburðir og við áttum að skora fleiri mörk,“ sagði Hrafnkell.

„Maður sá í öllum föstum leikatriðum að við kunnum þetta betur en þær,“ bætti hann við áður en Andri tók til máls á ný.

„Þetta er eitt af því sem Steini hefur gert vel með landsliðið, að nýta þessi föstu leikatriði og innköst.“

Hrafnkell segir að hann botni ekki í neikvæðri umræðu sem hefur verið um Þorstein Halldórsson landsliðsþjálfara.

„Mér finnst búin að vera mjög neikvæð umræða um þetta lið síðan Steini tók við og ég eiginlega skil það ekki. Þeir sem eru að horfa á þetta verða að átta sig á að við erum ekki með marga tæknilega góða leikmenn. Bara gleymið því. Við erum með mjög líkamlega sterkt lið, þokkalega sterkar til baka og með góða hafsenta. Svo erum við með Karólínu Leu og fljóta leikmenn fram á við. Við verðum að nýta okkar styrkleika og gera það vel.“

Umræðan í heild er í spilaranum.