Dagur B. Eggertsson, fyrrverandi borgarstjóri, segist hafa orðið hlessa í morgun þegar hann las viðtal við Guðlaug Þór Þórðarson, umhverfis, orku- og loftslagsráðherra, í Morgunblaðinu í morgun. Í viðtalinu lýsir Guðlaugur Þór því yfir að Sundagöng séu fýsilegri kostur en hin langþráða Sundabraut og bendir á ýmis rök máli sínu til stuðnings. Segir Dagur að um algjöra kúvendingu sé að ræða hjá ráðherranum sem hafi skammað sig árum saman fyrir að vera hlynntari gangnagerð en hraðbraut ofanjarðar.
„Lengi er von á einum. Ég hugsa að mörgum áhugamönnum og samgöngur og Sundabraut hafi svelgst á morgunkaffinu í morgun. Alla vega þeim hluta þeirra sem sjá Moggann. Ekki hef ég tölu á því hvað Guðlaugur Þór Þórðarson og Sjálfstæðisflokkurinn í borgarstjórn og á Alþingi hefur úthúðað mér og Samfylkingunni fyrir þá skoðun að Sundabraut í göngum ætti að vera fyrsti kostur á þeirri framkvæmd – frekar en brú,“ skrifar Dagur á Facebook-síðu sína.
Útskýrir Dagur að skammirnar hafi dunið á honum síðan hann leiddi samráðshóp með íbúum í Laugardal og Grafarvogi sem komst að þeirri niðurstöðu, í apríl 2006, að Sundagöng væri fyrsti valkostur sem hafi síðan orðið tillaga borgarstjórnar.
Nokkrum árum of seinn á vagninn
„Í Morgunblaðinu í dag er kostulegt viðtal við Guðlaug Þór þar sem hann þylur upp öll rökin fyrir Sundagöngum – og gerir að sínum: umhverfisrök, að hraðbrautir eigi ekki heima í íbúabyggð, sjónræn rök og náttúruverndarrök, „friðaðar fjörur og fjölskrúðugt dýralíf“. Hann leggur meira að segja beinlínis til að Sundagöng verði skoðuð í þeirri vinnu við útfærslu Sundabrautar sem nú fer fram og verði fjármögnuð með veggjöldum – í báðum tilvikum er hann reyndar nokkrum árum of seinn á vagninn því í samkomulagi okkar Sigurðar Inga Jóhannssonar innviðaráðherra frá 2021, sem unnið hefur verið eftir síðan var einmitt talað skýrt um hvoru tveggja. Nema skilja eigi Gulla þannig að hann vilji ganga ennþá lengra og krafan sé að Sundabraut eigi að vera í göngum, líka undir Geldinganes og alla leið upp á Kjalarnes, eða þá að hún verði alls ekki að veruleika,“ skrifar Dagur.
Hann skýtur svo á Sjálfstæðismenn og veltir fyrir sér hvort að ekki sé hægt að lesa út úr viðtalinu þá kröfu að undirbúningur og hönnun framkvæmdarinnar, sem er orðin eitthvað þreyttasta þrætuepli stjórnmálanna, fari aftur á upphafsreit.
„Öðru vísi mér áður brá. Ætli Sjálfstæðisflokkurinn hætti jafnframt ruglanda sínum og rangfærslum um að áhersla mín á Sundagöng sé fyrst og fremst tilraun til að tefja málið? Nei, ætli lærdómurinn sé ekki eitthvað á þá leið að farsælast sé að standa vörð um almannahagsmuni, vinna með íbúum, láta rökin ráða og vera tilbúinn að standa dálítið fast í ístaðinu þótt á ýmsu gangi,“ skrifar borgarstjórinn fyrrverandi.
