Sigríður Margrét Oddsdóttir, formaður Samtaka atvinnulífsins (SA) segir 28 flugumferðarstjóra í skæruverkföllum valda fjárhagslegu tjóni upp á annan milljarð króna fyrir fyrirtæki, röskun á samgöngum þúsunda flugfarþega síðustu dagana fyrir jól og neikvæðum áhrifum á ímynd áfangastaðarins Íslands. Þetta kemur fram í aðsendri grein á Vísir.is.

Ekkert hefur þokast í deilu flugumferðarstjóra og SA undanfarið og framundan er skæruverkfall á mánudagsmorgun sem mun valda mikilli röskun á millilandaflugi.

Sigríður segir flugumferðarstjóra krefjast launahækkana sem séu umfram þá launastefnu sem mörkuð hefur verið á almennum markaði. Ríkissáttasemjari hafi síðan engin völd til að framfylgja þessari launastefnu heldur sé valdalaus gestgjafi sem bjóði upp á kaffi og fundaraðstöðu. Um valdaleysi ríkissáttasemjara og afleiðingar þess segir Sigríður ennfremur:

„Áhrif þess að ríkissáttasemjari er í raun valdlaus á Íslandi birtast meðal annars í agaleysi hagstjórnarinnar. Hér á landi eru að meðaltali ríflega 500 einstaklingar að baki hverjum gerðum kjarasamningi á meðan þeir eru á bilinu 5-10.000 á hinum Norðurlöndunum. Ítrekað gera einstaka hópar kröfur um launahækkanir umfram þá launastefnu sem hefur verið mörkuð og umfram það sem er innistæða fyrir. Afleiðingin er okkur öllum kunn og hún hefur mest áhrif á þá sem síst skyldi.“

Sigríður segir að breyta þurfi lögum um stéttarfélög og vinnudeilur til að ríkissáttasemjari geti framfylgt launastefnu stefnumótandi kjarasamninga í öllum öðrum kjarasamningum. „Það má vona að yfirstandandi skæruverkföll örfárra einstaklinga, með tilheyrandi fjárhagstjóni og raski fyrir almenning, valdi því að aðilar vinnumarkaðarins eigi opið samtal um hvernig bæta megi vinnumarkaðslíkanið. Þá má einnig vona að stjórnvöld finni hjá sér hugrekkið og breyti hlutverki gestgjafans í Karphúsinu og geri honum kleift að vera ríkissáttasemjari.“