Jurgen Klopp, stjóri Liverpool, var alls ekki ánægður með frammistöðu sinna manna gegn Crystal Palace í leik sem fór fram í gær.

Liverpool vann 2-1 útisigur á Palace og fagnaði þremur stigum en frammistaða liðsins var ekki sannfærandi til að byrja með.

Klopp var sáttur með spilamennskuna á lokametrunum og virtust gestirnir taka við sér eftir að Mohamed Salah jafnaði metin.

Harvey Elliott tryggði Liverpool svo sigurinn með marki í uppbótartíma en þeir rauðklæddu hafa oft verið meira sannfærandi í sinni spilamennsku.

,,Við vorum einfaldlega ekki nógu góðir í dag. Við vorum lélegir í 76 mínútur sem er slæmt,“ sagði Klopp.

,,Tímasetningin var alltaf röng, við vorum rangstæðir svo oft. Þetta var skelfilegt.“

,,Við fengum mark á okkur úr vítaspyrnu og það leit út fyrir að það væri eitthvað sem við þurftum á að halda. Þeir fengu rautt spjald sem hjálpaði einnig.“

,,Ég bendi á að við vorum heppnir en frá 76 til 105 vorum við mjög góðir. Við vitum að við vorum að spila gegn tíu mönnum en við náðum að snúa þessu okkur í hag.“