Íslenskum karlmanni, Agnari Hólm Jóhannessyni, sem er fæddur árið 1966, hefur verið birt fyrirkall og ákæra í Lögbirtingablaðinu. Agnar er sakaður um nokkur brot er varða vopnalög og umferðarlög.

Á síðustu misserum hefur lögregla nokkrum sinnum stöðvað för hans um götur borgarinnar og hefur hann þá reynst vera undir áhrifum ýmissa lyfja og fíkniefna. Einnig hefur hann haft rafmagnsvopn og hníf í fórum sínum.

Agnar Hólm á langan brotaferil að baki. Árið 2017 lýsti Alþjóðalögreglan Interpol eftir honum en þá var hann ákærður fyrir nauðgun, þjófnað og líkamsárás. Lét hann ekki sjá sig við þingfestingu málsins og var því lýst eftir honum. Árið 2018 var Agnar Hólm síðan dæmdur í fjögurra ára fangelsi fyrir þessi brot.

Á árunum 1987 til 2003 hlaut hann dóma fyrir skjalafals, auðgunarbrot, brot á umferðarlögum og lögum um ávana- og fíkniefni. Árið 2010 hlaut hann fangelsisdóm vegna umferðarlagabrota, fíkniefnalagabrots og þjófnaðar.

Þar sem ekki hefur tekist að birta Agnari Hólm ákæru núna er hún birt í Lögbirtingablaðinu og honum birt fyrirkall, svohljóðandi:

„Ákærði er kvaddur til að koma fyrir dóm, hlýða á ákæru, halda uppi vörnum og sæta dómi. Sæki ákærði ekki þing má hann búast við því að fjarvist hans verði metin til jafns við það að hann viðurkenni að hafa framið brot það sem hann er ákærður fyrir og dómur verði lagður að honum fjarstöddum.“

Málið verður tekið fyrir í Héraðsdómi Reykjavíkur 10. janúar 2024.