Jón Þór Ólafsson, fyrrum þingmaður Pírata, er orðinn stöðumælavörður í Reykjavík. Jón, sem hætti á Alþingi síðasta haust, segist vera ánægður í nýja starfinu en hann hóf störf í gær.

„Það er yndislegt að labba út í ferska loftinu og hafa enga ábyrgð nema framfylgja einni lagagrein, 108. grein umferðarlaga,“ segir Jón í samtali við Fréttablaðið.

Eins og greint var frá í haust hætti Jón á Alþingi og fór aftur að starfa við malbik, líkt og hann hafði gert um árabil áður en hann varð þingmaður Pírata í síðustu Alþingiskosningum. Jón sagðist ekki hafa fundið sig sem þingmaður og því ákveðið að stíga til hliðar, jafnvel þótt að flokkur hans væri mikilli sókn.

Malbiksstörf eru árstíðabundin og segir Jón að hann hafi því sótt um tímabundið starf hjá Bílastæðasjóði sem stöðumælavörður. Þar hyggst Jón starfa fram að vori, eða þangað til að malbiksvinnan hefst á ný.

„Ég fór að hugsa um hvað ég gæti gert sem ég gæti gripið í inn á milli og sagði þeim að ég færi í malbikið aftur, þetta væri tímabundið. Ég sagði þeim að ég teldi starfið henta mér vel og þeir vildu ráða mig,“ segir Jón Þór og vísar þar í Bílastæðasjóð.