Miðstjórn Rafiðnaðarsambands Íslands skorar á Pálmar Óla Magnússon, stjórnarformann Birtu lífeyrissjóðs, að stíga til hliðar á meðan rannsókn á meintum brotum Samskipa gegn banni við ólögmætu samráði. Þetta kemur fram í ályktun sem birt var á vef RSÍ nú fyrir stundu en eins og komið hefur fram starfaði Pálmar Óli sem framkvæmdastjóri millilandssviðs Samskipa á þeim tíma á þeim tíma sem er til rannsóknar og varð til þess að skipafélagið fékk 4,2 milljarða sekt frá Samkeppniseftirlitinu.

„Seta Pálmars Óla í stjórn og sem stjórnarformaður Birtu lífeyrissjóðs getur haft þær afleiðingar að skaða ímynd Birtu meðal sjóðsfélaga og almennings og haft bein áhrif á trúverðugleika og orðspor sjóðsins,“ segir í ályktun RSÍ en miðstjórn sem og fulltrúaráð Birtu lífeyrissjóðs meta að Pálmar Óli uppfylli ekki lengur skilyrði í samþykktum lífeyrisjóðsins þar sem kveðið er á um að gott orðspor stjórnarmanna.

Pálmar Óli, sem starfar sem forstjóri Daga hf., tók við stjórnarformennsku í Birtu í maí á þessu ári en hann neitar að víkja úr stólinum þrátt fyrir að vera með réttarstöðu sakbornings í málinu. Pálmar Óli er fulltrúi Samtaka atvinnulífsins í stjórn Birtu og hafa samtökin haft hæfi hans til skoðunnar síðan að málið kom upp. Niðurstaðan virðist þó hafa orðið sú að reglur heimiluðu ekki að hróflað yfir við Pálmari Óla og við það er miðstjórn RSÍ allt annað en sátt og telja að breytinga sé þörf.

„Miðstjórn RSÍ telur aðgerðaleysi Samtaka atvinnulífsins gagnvart þessu máli verulega gagnrýnivert og vekur upp spurningar um það hvort eðlilegt sé að fulltrúar atvinnurekenda sitji í stjórnum sjóða sem hafa það eitt markmið að tryggja launafólki lífeyri á efri árum. Einsýnt er að nauðsynlegt er að gera breytingar á aðkomu atvinnurekenda í stjórnum lífeyrissjóða,“ segir í ályktuninni.