Kim Jong-un, einræðisherra í Norður-Kóreu, lagði á sunnudaginn af stað heim á leið eftir sex daga heimsókn hjá Vladímír Pútín í Rússlandi. Umheimurinn hefur áhyggjur af að þeir félagar hafi gert samning um að Norður-Kórea útvegi Rússum skotfæri og hugsanlega vopn gegn því að fá aðgang að tækni til að senda gervihnetti á braut um jörðina og jafnvel tækni sem er hægt að nota í kafbáta og kjarnorkuvopn.

The Guardian segir að Kim hafi lagt af stað heim frá Primorye-héraðinu í austurhluta Rússlands eftir kveðjuathöfn á lestarstöðinni en einræðisherrann fór í brynvarinni járnbrautarlest sinni í þessa langferð.

Ferðin var fyrsta ferð hans út fyrir landsteinana í rúmlega fjögur ár. Hann hitti Pútín og heimsótti hergagnaverksmiðjur og verksmiðjur sem framleiða hátæknibúnað. Hann heimsótti einnig háskóla og horfði á sýningu í sædýrasafni.

Heimsóknin sýndi að Rússar og Norður-Kóreumenn eiga svipaðra hagsmuna að gæta en bæði ríkin eiga í útistöðum við Vesturlönd.  Bandarískir og suðurkóreskir embættismenn hafa sagt að Kim gæti hafa fallist á að láta Pútín skotfæri í té gegn því að fá aðgang að háþróaðri tækni sem getur nýst í kjarnorkuvopnaáætlun Norður-Kóreu.