Hanna Katrín Friðriksson, þingflokksformaður Viðreisnar, styður hvalveiðibann Svandísar Svavarsdóttur matvælaráðherra og telur að Svandís hafi orðið að bregðast skjótt við á grundvelli nýfenginna upplýsinga þegar hún bannaði hvalveiðar sólarhring áður en þær áttu að hefjast í júní.

Hanna Katrín er viðmælandi Ólafs Arnarsonar í nýjasta hlaðvarpi Markaðarins á Eyjunni.

Markaðurinn - Hanna Katrín Friðriksson 2

Hún segir stuðning sinn við hvalveiðar nýtilkominn. Hún hafi alveg stutt hvalveiðar m.a. út frá atvinnufrelsi. Hún telji þær hins vegar ekki ganga upp lengur, hvorki siðferðilega, umhverfislega né efnahagslega. Ekki megi gleyma því heldur að Hvalur hf. sé margbrotlegt fyrirtæki, hafi m.a. brotið alla fresti sem fyrirtækinu hafi verið settir og beri öðrum fremur ábyrgð á þeirri stöðu sem sé uppi í þessum málum. Hingað til hafi sjávarútvegsráðherrar einfaldlega horft í gegnum fingur sér varðandi athæfi fyrirtækisins.

Hanna Katrín segir að þótt litill tími hafi verið til ákvarðanatöku í vor horfi málið öðru vísi við nú. Liðnar séu margar vikur og ákvörðun ætti að liggja fyrir nú þegar um það hvert framhaldið verður; hvort hvalveiðibannið verður framlengt eða því aflétt eftir hálfan mánuð.

Hún segir málið áhugavert þar sem ríkisstjórnarflokkarnir séu ósammála og tali inn í sitt bakland. „Þess vegna springur þetta út meira en kannski miklu stærri mál sem ágreiningur er um í ríkisstjórninni,“ segir Hanna Katrín, sem segir ríkisstjórnina vera ríkisstjórn hrossakaupa. Hún telur að Svandís þurfi að bakka með hvalveiðibannið en varpar fram þeirri spurningu hvort VG muni gefa eftir í hvalveiðimálum gegn því að fá eitthvað annað í staðinn.