Þeim hefur ekki alltaf komið saman, margir muna eftir því þegar þær slógust árið 2020.
Í apríl kom út sérstakur brúðkaupsþáttur af The Kardashians þar sem sýnt var frá brúðkaupi Kourtney og Travis Barker á Ítalíu í maí 2022.
Áhorfendur tóku eftir því að það virtist anda köldu milli systranna, Kourtney virtist hunsa systur sína og almennt var frekar vandræðalegt andrúmsloft í kringum þær.
Í nýjasta The Kardashians þættinum, sem kom út í gær, greinir Kourtney frá því að þær hafi svo sannarlega verið að rífast á þessum tíma og að hún hafi verið mjög sár út í systur sína.
Hún sagði það hafa verið vegna þess að Kim hafi ákveðið að fara í samstarf með Dolce & Gabbana örfáum mánuðum eftir brúðkaupið, en Kourtney var í samstarfi með tískuhúsinu fyrir brúðkaupið. Henni fannst Kim vera að stela athyglinni frá sér og gera lítið úr stóra deginum.
„Þetta er bókstaflega eftirlíking af brúðkaupinu mínu,“ sagði Kourtney við aðra systur sína, Kendall Jenner, í þættinum.
Kourtney sagði að henni hafi liðið eins og hún væri sérstök þegar D&G leyfði henni að klæðast fatnaði þeirra frá tíunda áratugnum og það hafi því verið mjög sárt að sjá að samstarf Kim snerist um klæðnað tískuhússins frá 1987 til 2007.
„Hún var ekki ánægð í brúðkaupinu mínu. Allir voru alveg: „Vá, þetta er magnað. Við erum að skemmta okkur svo vel.“ En hún gat aldrei viðurkennt það. Hún sá allt sem ég gerði og ákvað að gera það sjálf,“ sagði hún.
„Á meðan ég var að gifta mig var Kim að eiga samræður við Dolce sem ég hafði ekki hugmynd um.“
Kourtney sagði að enginn þurfi að fá leyfi frá henni til að vinna með Dolce & Gabbana en henni hafi liðið eins og Kim hafi valið frama fram yfir fjölskyldu með því að fara í samstarf með tískuhúsinu svona stuttu eftir brúðkaupið, henni fannst systir hennar stela athyglinni frá stóra deginum hennar.
„Ef ég hefði gert þetta við Kim þá hefði hún fríkað út. Fyrir mig var þetta persónulegt, ég held að það hafi verið ástæðan fyrir því að ég hafi orðið svona sár.“
