Bretar hafa sent lögreglumenn til Frakklands til að aðstoða frönsku lögregluna við að reyna að draga úr ferðum förufólks yfir Ermarsund til Bretlands. Nú hafa Bretar boðist til að senda lögreglumenn til Túnis og Alsir til að aðstoða þarlend yfirvöld við að stöðva næstu bylgju bátaflóttafólks frá Norður-Afríku.

Ítalska ríkisstjórnin segir að allt að 400.000 afrískir flóttamenn muni fara yfir Miðjarðarhafið til Ítalíu á þessu ári. Þetta eru fjórum sinnum fleiri en allt síðasta ár.

Á fyrstu þremur mánuðum ársins komu 80.000 flóttamenn til Ítalíu og þetta telja Bretar ekki góða þróun. Ríkisstjórnin er sannfærð um að þetta muni hafa dómínóáhrif þannig að ekki líði á löngu þar til margir af þessum flóttamönnum birtist í Frakklandi og séu reiðubúnir til að leggja í lífshættulega för yfir Ermarsund.

Af þessum sökum fór Robert Jenrick, innanríkisráðherra, nýlega til Túnis og Alsír til að bjóða þarlendum yfirvöldum alla þá aðstoð sem Bretar geta veitt þeim í baráttunni við velskipulagða hópa smyglara sem sjá um að ferja fólk yfir Miðjarðarhaf.

The Times segir að það séu lögreglumenn frá The National Crime Agency, sem er hliðstæða bandarísku alríkislögreglunnar FBI, sem breska ríkisstjórnin bjóði fram til samstarfs við yfirvöld í Túnis og Alsír.