Það er slæmt. Hún er óþétt, veikburða, raflagnir þykja ótraustar og það er asbest út um allt. Byggingin hefur verið nánast pökkuð inn í stillansa árum saman vegna viðhaldsvinnu en það virðist ekki hafa haft mikil áhrif til batnaðar. Dagbladet skýrir frá þessu og vísar í nýja skýrslu um ástand byggingarinnar.
Skýrslan er frá eftirlitsnefnd þingsins. Í henni kemur meðal annars fram að byggingin sé að molna, sé óþétt, mikið sé af asbesti í henni og að það sé „raunveruleg og vaxandi hætta á að hún geti hrunið“.
Auk óþéttleika og lausra múrsteina og þakflísa, sem hrynja úr byggingunni, er mikil hætta á eldsvoða að því er segir í skýrslunni.
Skýrsluhöfundar segja að núverandi viðhaldsvinna hafi gengið hægt og aðallega gengið út á bráðabirgðalausnir. Þetta kosti breska skattgreiðendur sem svarar til um 360 milljóna íslenskra króna á viku.
Nefndin gagnrýnir margra ára frestanir á viðhaldsverkefnum. Fyrir fimm árum samþykktu þingmenn að flytja úr byggingunni innan nokkurra ára til að hægt sé að sinna umfangsmiklu viðhaldi á henni. En mörgum hefur snúist hugur og vilja ekki yfirgefa bygginguna.
Á síðasta ári var nefndin, sem átti að stýra viðhaldsverkefninu, lögð niður og ástand byggingarinnar heldur því áfram að versna.
Þakið lekur, rúmlega 100 ára gamlar vatnsleiðslur springa og öðru hvoru falla hlutir af þakinu og útveggjum. Rafkerfið var síðast endurnýjað á fimmta áratug síðustu aldar.
Eftirlitsnefndin telur að svo mikið asbest sé í byggingunni að það muni taka 300 manns um tvö og hálft ár að fjarlægja það.