CNN skýrir frá þessu og segir að samkvæmt niðurstöðum nýrrar rannsóknar þá séu það loftslagsbreytingarnar og mikil vatnsnotkun jarðarbúa sem valda þessu.
Vötn þekja um 3% af yfirborði jarðarinnar en þau eru uppspretta 90% alls ferskvatns og eru meðal annars notuð sem drykkjarvatn, við vökvun og við rafmagnsframleiðslu.
Á síðustu misserum hafa margar fréttir borist af minnkandi vatnsmagni í Lake Mead í Bandaríkjunum en þetta gríðarlega stóra uppistöðulón er vatnsuppspretta margra milljóna Bandaríkjamanna. Sama staða er uppi á teningnum víðar um heim.
Í nýju rannsókninni báru vísindamenn við University of Colorado Boulder saman gervihnattarmyndir frá 1992 til 2020 og sáu að vatnsyfirborð margra vatna hafði lækkað. Tæplega 2.000 vötn og uppistöðulón voru til skoðunar.
53% þeirra höfðu misst „mikið magn“ vatns eða sem svarar til 22 milljarða rúmmetra vatns.
Fangfang Yao, aðalhöfundur rannsóknarinnar, sagði að mikilvægur þáttur, sem er oft ekki tekinn með, sé að vatnsgæðin minnka samhliða hlýnandi loftslagi.