Rússneskir vísindamenn krufðu nýlega 8.000 ára gamlan vísund sem var grafinn upp úr sífreranum. Hann hafði varðveist svo vel að vísindamennirnir telja að hægt sé að klóna hann. En ekki eru allir vísindamenn sammála um þetta.

Vefir líkamans, sem voru fjarlægðir í krufningunni, eru svo vel varðveittir að rússnesku vísindamennirnir telja að hægt sé að klóna dýrið að sögn Live Science.

Um er að ræða dýr af óþekktri tegund vísunda. Það fannst síðasta sumar í Verkhoyansk í Rússlandi. Rannsókn leiddi í ljós að dýrið var 1 til 2 ára þegar það drapst. Ekki er vitað hvers kyns það var.  Talið er að dýrið hafi verið uppi fyrir 8.000 til 9.000 árum.

Sýni voru tekin af ull þess, húð, beinum, vöðvum, fitu og hornum og heili þess var fjarlægður í heilu lagi.

Vefir líkamans eru svo vel varðveittir að sumir hafa vonir um að hægt verði að endurlífga þessa útdauðu tegund.

En ekki eru allir sannfærðir um að það sé hægt. Þeirra á meðal er Love Dalén, steingervingafræðingur við Stokkhólmsháskóla, sem segir líklega sé erfðaefni dýrsins of skaddað til að hægt sé að klóna það.