Ragnar Þór Ingólfsson, formaður VR, segir að nóg sé komið af sinnuleysi ríkisstjórnar og Seðlabanka Íslands gagnvart hagsmunum almennings. Hvetur hann fólk til að mótmæla með sér þegar leiðtogafundur Evrópuráðsins fer fram svo umheimurinn megi sjá hvað Íslendingum finnist um þá stöðu sem uppi er í þjóðfélaginu.

„Á meðan innviðir grotna niður og stórkostlegir flutningar fjármagns eiga sér stað frá skuldugum heimilum, á meðan heilbrigðiskerfið er að þrotum komið, í skelfingar ástandi á leigumarkaði, í viðvarandi húsnæðisskorti, á meðan svik og vanefndir eru algjör gagnvart samningum við verkalýðshreyfinguna, á meðan unga fólkinu er úthýst af húsnæðismarkaði fyrir lífstíð, á meðan barnafjölskyldur fá ekki dagvistun fyrir börnin, á meðan eldri borgarar, öryrkjar og láglaunafólk búa við sára fátækt og skort, á meðan opinberum starfsmönnum sem sinna mikilvægri grunnþjónustu er sagt upp, á meðan gamla fólkið deyr frá biðlistum eftir úrræðum, á meðan unga fólkið okkar og fjölskyldur þeirra mæta algjöru úrræðaleysi í geðheilbrigðismálum, á meðan biðtími á bráðamóttöku og læknavöktum mælist í 6 til 8 klukkustundum og lengist, á meðan þjónustan fer fram innan um örmagna heilbrigðisstarfsfólk á göngum sjúkrahúsa, á meðan ríkisstjórnin neitar að upplýsa almenning um sölu ríkiseigna í gegnum Lindarhvol, á meðan opinber gjöld eru aukin á almenning og auðstéttinni hlíft, á meðan Seðlabankinn hefur hækkað stýrivexti ellefu sinnum í röð?“

Ragnar heldur svo áfram og bendir á að staðan sé sífellt að versna á meðan fyrirtæki, útgerðin og bankar græði sem aldrei fyrr.

„Á meðan staðan versnar bara og versnar?
Á meðan græða fyrirtækin sem aldrei fyrr og fjármálakerfið slær um sig með steinprýddum glerhöllum fyrir ofurgróða síðustu ára, gróða sem eykst bara og eykst á kostnað almennings, á meðan bankarnir skerða þjónustu og hækka gjaldskrár, á meðan útgerðarelítan mokar inn gróða af auðlindum okkar allra, á meðan auðstéttin hefur tekið milljarða tugi af braski með fiskeldi og öðru náttúruníði, á meðan innviðir eru einkavæddir og komið á vildarkjörum til útvalinna, á meðan taumlaus græðgin og dekur stjórnvalda við sérhagsmunaöflin er allt að drepa.“

Ragnar segir að svona muni aðstæður halda áfram að versna þar til þjóðin rís upp og segir að nú sé nóg komið. Sá tími sé kominn.

„Staðan mun versna þangað til við rísum upp og segjum stopp!
Nú er komið nóg!
Hingað og ekki lengra!
Ertu til í slaginn með mér? Deildu þá og rísum upp saman.
Dagskrá auglýst síðar.“