Kjarasamningur Eflingar og Reykjavíkurborgar, sem var undirritaður þann 1. apríl, hefur verið samþykktur af Eflingarfélögum, og það með miklum meirihluta.
Atkvæðagreiðslu lauk á hádegi í dag.
Já sögðu 756, eða tæp 89 prósent og nei sögðu 57, eða tæp 7 prósent. 38, eða rúm 4 prósent, tóku ekki afstöðu.
Kjörsókn var rúmlega 40 prósent, en til atkvæða gengu 851 af þeim 2.098 sem eru á kjörskrá.
Kjarasamningurinn hefur því tekið gildi.
Sem dæmi um þær launahækkanir sem felast í samningnum hefur Efling bent á að leiðbeinandi á leikskóla með eins árs starfsreynslu hækkar um rétt rúmar 39 þúsund krónur á mánuði. Að sama skapi mun deildarstjóri á leikskóla með níu ára starfsreynslu hækka um rúmar 47 þúsund krónur og verkamaður í útivinnu með sjö ára starfsreynslu um rúmar 41 þúsund krónur.
Sólveig Anna Jónsdóttir, formaður Eflingar, lét hafa eftir sér eftir að samningurinn var undirritaður að niðurstaðan sé ásættanleg. Til staðar hafi verið samningsvilji og lausnarmiðun af hálfu borgarinnar og hafi raunverulegt samtal náðst. Deilunni var aldrei vísað til ríkissáttasemjara.
