Það er nauðsynlegt að auka skotfæraframleiðsluna til að geta stutt við bakið á Úkraínumönnum í baráttu þeirra gegn rússneska innrásarliðinu. Þetta kallar á aukinn útgjöld og fjárfestingar til að auka framleiðslugetu skotfæraverksmiðja og bæta við verksmiðjum.
Danir eru meðal þeirra aðildarríkja sem eru nú að skoða hvað þeir geta gert í þessu og er talið líklegt að skotfæraframleiðsla hefjist í Frederikshavn á Norður-Jótlandi á nýjan leik en þar var áður skotfæraverksmiðja en henni var lokað 2020.
Mette Frederiksen, forsætisráðherra, sagði í síðustu viku að Úkraínumenn noti mikið af skotfærum og reiknað sé með að þeir muni gera það áfram. Þess vegna þurfi að senda þeim enn meira og auka framleiðslugetuna. Einnig verði Evrópuríki að fylla á eigin birgðageymslur en töluvert hefur gengið á birgðir vegna stríðsins í Úkraínu.
Leiðtogar ESB-ríkjanna samþykktu að setja sem svarar til um 300 milljarða íslenskra króna í framleiðslu og kaup á fallbyssukúlum fyrir Úkraínumenn. Þetta dugir fyrir einni milljón kúlna og verða þær sendar til Úkraínu á næstu 12 mánuðum.
Kúlurnar verða framleiddar í aðildarríkjum ESB og setur það aukinn þrýsting á vopnaverksmiðjur í meðal annars Þýskaland, Slóvakíu og Svíþjóð sem verða nú að framleiða enn meira en áður.
