„Áður fagnaði ég því að Edda skyldi gefa konum tækifæri til þess að tjá reynslu sína vegna þess að oftast er það þeirra eina úrræði í mjög viðkvæmri stöðu. Þar með gátu þær raungert reynslu sem aðrir reyndu að útmá. Það var mikilvægt og trúverðugleiki þeirra kvenna sem stigu fram er ósnortinn. Hins vegar hefur Edda Falak sýnt fram á að hún hefur ekki burði til þess að sinna þessum erfiða málaflokki,“ segir Sigríður Mjöll Björnsdóttir doktor í almennum málvísindum sem starfar sem nýdoktor við Konstanz-háskóla í Þýskalandi.
Í færslu sem Sigríður skrifaði á Facebook í gær beinir hún orðum sínum til Heimildarinnar, þar sem Edda starfar sem blaðamaður, og segist Sigríður lýsa yfir yfir vantrausti á Heimildinni sem fréttamiðli „í ljósi afstöðu hennar til „missagna“ Eddu Falak sem gerst hefur sek um það að „missegja“ um starfsferil sinn.“
Segir Sigríður að í hennar starfi sem háskólakennari hefði hún umsvifalaust verið rekin hefði hún gerst sek um slíkt hið sama. „En í fjölmiðli sem (kaldhæðnislega) kallar sig „Heimildin“ virðast lygar afstæðar.“
Frosti birtir opið bréf til ritstjórnar Heimildarinnar og spyr ágengra spurninga um Eddu Falak
Mál Eddu hefur vakið athygli undanfarna daga eftir að Frosti Logason fjölmiðlamaður fullyrti í þætti sínum Brotkast að Edda hafi logið til um starfsreynslu sína í viðtölum við stærstu fjölmiðla landsins. Sex dögum seinna birti hann opið bréf til ritstjórnar Heimildarinnar og krafðist viðbragða við fullyrðingum þess efnis að Edda hafi gerst sek um ósannindi varðandi bakgrunn sinn í viðtölum. Degi síðar sendu fyrirsvarsmenn Heimildarinnar frá sér yfirlýsingu þar sem fram kom að Edda bæðist velvirðingar á missögninni.
Edda biðst velvirðingar á missögnum varðandi starfsferil sinn
Telur Eddu hafa grafið undan trúverðugleika sínum
Mörgum finnst yfirlýsingin léttvæg og Edda hafa grafið undan trúverðugleika sínum. Sigríður er á þeirri skoðun.
„Ég hef aldrei áður heyrt nafnorðið missögn þrátt fyrir að hafa að miklu leyti eytt minni starfsævi í að skoða íslenskt mál. Ég veit í raun varla hvað orðið þýðir. Það eina sem ég veit er að Edda Falak hefur með mjög alvarlegum hætti grafið undan trúverðugleika sínum. Að Frosti Logason skyldi afhjúpa hana var, að mínu mati, óheppileg tilviljun — en það kemur ekki í veg fyrir þá staðreynd að með lágmarks rannsóknarvinnu hefði hver sem er getað gert slíkt hið sama,“ segir Sigríður.
Vann úr reynslu sinni í MeToo byltingunni
Hún segir Heimildina halda því fram að um „menningarstríð“ sé að ræða þar sem andstæðingar MeToo ráðist gegn Eddu Falak. „Fyrir mig var MeToo bylting sem gaf mér fyrst kleyft að vinna úr hörmulegri reynslu. En að einhver skuli nýta sér ömurlega reynslu fólks til frama í fjölmiðlum er mér ofar skilningi. Ég hef reynt það á eigin skinni hvernig það er að vera brotaþoli ofbeldis og veruleika þess að reyna að reka ofbeldismál í dómskerfinu. Það er ekki auðvelt hlutskipti. Að einhver hafi skapað sér svigrúm í umræðunni á grundvelli falskra reynslusagna er vægast sagt móðgun við brotaþola ofbeldis. Mér blöskrar yfirhylmingin og tvískinnungshátturinn sem birtist í umræðunni um þetta mál. Allt er það í mótsögn við þau gildi sem drifu MeToo-hreyfinguna áfram.“
„Til að benda gráu ofan á svart hafi Edda síðastliðinn sólarhring hótað „lúserum“ ofbeldi á samfélagsmiðlum,“ segir Sigríður og vísar þar til umdeilds tíst Eddu á föstudagskvöldi síðasta þar sem hún skrifaði: „Sendi Gunna Nelson á næsta lúser sem fær mig á heilann“ og myllumerkti Vikunni, sjónvarpsþætti Gísla Marteins, sem ávallt er á dagskrá á föstudagskvöldum. Tístið birtist á skjánum á meðan útsendingu þáttarins stóð.
Segist Sigríður ekki skilja af hverju ýmsar konur á samfélagsmiðlum styðja Eddu Falak í krafti #afsakið. „Þetta hefur ekkert með þá alvarlegu staðreynd að gera að Edda Falak bjó til falskan söguþráð sem varð henni til frama í fjölmiðlum.“
