Samninganefnd Eflingar hefur samþykkt þrjár nýjar verkfallsboðanir. Þetta kemur fram í tilkynningu frá félaginu.  Boðanirnar eru eftirfarandi:

• Verkfall á öllum gistiheimilum og hótelum á félagssvæði Eflingar. Þar undir falla hótelkeðjurnar Centerhotels og Keahótels, auk fjölda annarra hótela og gistihúsa. Áætlaður fjöldi er um sex hundrað manns. Með þessari vinnustöðvun yrðu öll störf undir kjarasamningum Eflingar á hótelum komin í verkfall.
• Verkfall hjá öryggisvörslufyrirtækjum. Undir boðunina falla fyrirtækin Securitas og Öryggismiðstöð Íslands, auk smærri fyrirtækja. Um er að ræða um fjögur hundruð manns.
• Verkfall hjá ræstingafyrirtækjum. Undir boðunina falla stærstu þrifafyrirtæki landsins á borð við Sólar og Daga auk minni fyrirtækja. Áætlaður fjöldi á kjörskrá er um 650 manns.

Atkvæðagreiðslur félagsmanna um þessi verkföll hefjst á hádegi á fimmtudag og lýkur þeim kl. 18 næstkomandi mánudag.

Þrjár fyrri verkfallsboðanir voru samþykktar en á hádegi næstkomandi miðvikudag hefst verkfall olíubílstjóra. Hörður Gunnars­son, fram­kvæmda­stjóri Olíu­dreifingar, segir að á­hrifa verk­falls bíl­stjóra, sem sjá meðal annars um olíu­dreifingu, fari að gæta innan tveggja til þriggja sólar­hringa eftir að fyrir­hugað verk­fall hefst á há­degi á mið­viku­dag (Sá vef Fréttablaðsins).

„Við höfum séð með skýrum hætti í verkfallsatkvæðagreiðslum síðustu vikna að ómissandi verkafólk í öllum geirum vinnumarkaðarins á Höfuðborgarsvæðinu stendur sameinað. Krafa okkar er um sanngjarnan kjarasamning þar sem tekið er tillit til aðstæðna og samsetningar félagsmannahópsins. Ég hvet til þess að gengið verði til samninga við okkur,“ er haft eftir Sólveigu Önnu Jónsdóttur, formanni Eflingar, í tilkynningu félagsins.