Eiginkona Tómasar Waagfjörð, mannsins sem lést í harmleiknum á Ólafsfirði í byrjun október, var kærð fyrir að hafa stungið hann með eggvopni í mars á þessu ári. Þetta kemur fram í úrskurði Landsréttar sem staðfestir úrskurð héraðsdóms Norðurlands eystra um gæsluvarðhald yfir konunni. Úrskurðurinn var kveðinn upp þann 5. október síðastliðinn en birtist á vefsíðu Landsréttar í gærkvöldi.
Vísir greindi fyrst frá því að úrskurðurinn snérist um eiginkonu hins látna í málinu. Eiginkonan er ein af þremur einstaklingum sem handteknir voru í tengslum við málið daginn eftir að Tómas var stunginn til bana. Í úrskurðinum kemur fram að gögn bendi til þess að upphaf málsins hafi verið að Tómas hafi sent einstakling að sækja eiginkonu sína á heimili við Ólafsveg. Einstaklingurinn virðist hafa snúið til baka og tjáð Tómasi að eiginkona hans hafi ekki viljað koma með honum, hún virðist hafa verið undir áhrifum áfengis og hugsanlega einhverjum öðrum vímugjöfum.
Tómas fór þá sjálfur á heimilið og við það hófst atburðarás sem lauk með því að Tómas var stunginn og lést af völdum þess. Ekki er enn vitað hver veitti Tómasi þá áverka sem virðast hafa leitt til dauða hans. Í úrskurði héraðsdóms Norðurlands Eystra kemur fram að ýmislegt bendi til þess að það hafi verið maðurinn sem situr enn í gæsluvarðhaldi og Tómas hafi verið í átökum þar sem hnífi var beitt. Sá maður var einnig með sár eftir hnífstungur á vettvangi, var hann meðal annars stunginn í fót og andlit.
Í úrskurði Landsréttar segir:
„Samkvæmt rannsóknargögnum málsins virðist varnaraðili hafa verið í sama rými í íbúð að […]og maki hennar, sem fannst látinn á vettvangi, bæði í aðdraganda átaka sem þar áttu sér stað, og þegar vitni kom til aðstoðar eftir að þau voru um garð gengin.“
