Frá og með 31. október 2022 mun starfsemi Sony Music skrifstofunnar á Íslandi hætta formlega störfum. Ástæðan er stefnubreyting hjá Sony Music Entertainment. Öllum þremur starfsmönnum skrifstofunnar hefur verið sagt upp störfum hérlendis samkvæmt heimildum DV og mun starfsemin færast til Danmerkur.

Í tilkynningu frá Sony Music Entertainment kemur fram að breytingin muni ekki hafa nein áhrif á samninga sem nú þegar eru í gildi hjá fyrirtækinu. Þar á meðal eru margar skærustu stjörnurnar í íslensku tónlistarlífi eins og Aron Can, GDRN, Herra Hnetusmjör, Mugison, Ragga Gröndal, Valdimar og Klara Elías svo einhver séu nefnd. Allir þættir dreifingar á íslenskum útgáfum mun hér eftir vera í höndum dönsku skrifstofunnar í Kaupmannahöfn.

„Við viljum fyrst og fremst þakka því hæfileikaríka tónlistarfólki sem treyst hafa okkur fyrir sköpun sinni en einnig nýta tækifærið og þakka Arnóri Dan Arnarsyni fyrir stórkostlega vinnu og uppbyggingu Sony Music Iceland undanfarin 5 ár. Án hans ástríðu, hæfni og vinnusemi hefði Sony Music Iceland aldrei tekist á loft en framlag hans og stuðningur til íslensk tónlistarlífs er ómetanlegur. Einnig viljum við þakka Önnu Jónu Dungal og Pétri Finnbogasyni fyrir þeirra mikilvæga framlag og fyrir að hafa mótað sterkt teymi innan íslensku skrifstofunnar,“ segir í tilkynningunni.

DV hafði samband við Arnór Dan vegna málsins en hann sagðist ekki geta tjáð sig um málið á þessari stundu.

Sony Music Entertainment er annað stærsta plötu- og útgáfufyrirtæki heims með um yfir 40 útibú víðsvegar um heiminn. Þeim hefur því nú fækkað um eitt.