Ásdís Karen Halldórsdóttir, leikmaður Vals, hefur verið kölluð inn í A-landsliðshóp kvenna fyrir leikina gegn Hvíta-Rússlandi og Hollandi í byrjun næsta mánaðar. Kemur hún inn fyrir Öglu Maríu Albertsdóttur, sem ekki getur verið með vegna meiðsla.
Ísland er í öðru sæti riðilsins, tveimur stigum á eftir Hollandi. Liðið á þó leik til góða, sem það spilar við Hvít-Rússa á Laugardalsvelli 2. september.
Svo er úrslitaleikur um beint sæti í lokakeppni HM við Holland ytra fjórum dögum síðar. Liðið sem hafnar í öðru sæti fer í umspil.
Ásdís Karen Halldórsdóttir hefur verið kölluð inn í hóp A landsliðs kvenna fyrir leikina gegn Belarús og Hollandi.
Agla María Albertsdóttir getur ekki tekið þátt í leikjunum vegna meiðsla.#alltundir #dottir pic.twitter.com/3Eq0pvwOFY
— Knattspyrnusambandið (@footballiceland) August 23, 2022
Þorsteinn Halldórsson, þjálfari landsliðsins, ræddi við 433.is um verkefnin framundan á dögunum.
„Þetta leggst vel í mig. Ég er bjartsýnn og hef fulla trú á að við gerum það sem til þarf til að komast áfram,“ sagði Þorsteinn.
Þó margra augu séu á leiknum við Holland hefur Þorsteinn engar áhyggjur af því að það verði ekki full einbeiting á leikinn við Hvít-Rússa.
„Ég hef engar áhyggjur af því. Þessar stelpur vita alveg hvað þarf að gera til að komast á HM og við munum gera það. Við komum inn í leikinn á móti Hvít-Rússum af fullum krafti.“
Ísland mætir Hvít-Rússum hér heima og Hollendingum ytra. „Ég vonast til að fólk mæti og styðji við liðið, að allir sem voru að tjá sig um það að það hafi ekki verið spilaður heimaleikur áður en við fórum á EM, að þau mæti allavega núna, geri hlutina almennilega, að fólkið sem er að tjá sig endalaust láti sjá sig á vellinum. Þetta snýst um stuðnings, ekki eintómt blaður.“
Þorsteinn væri einnig til í að sjá fólk mæta á útileikinn við Holland. „Ég held það verði slatti á vellinum á Hollandi og góð stemning. Það skiptir okkur máli, það sýndi sig á EM að stuðningur íslenskra áhorfenda er góður og hjálpar liðinu yfir þröskuldinn.“
Ísland tók þátt í lokakeppni EM á dögunum. Liðið gerði jafntefli í öllum leikjum sínum í riðlakeppninni og komst ekki áfram.
„Ég held algjörlega að leikmenn noti þau sárindi sem við upplifðum eftir að hafa ekki komist upp úr riðlinum, það ýti enn meira við okkur í að taka næsta skref,“ sagði Þorsteinn Halldórsson, landsliðsþjálfari Íslands í knattspyrnu.
