Brooklyn Beckham fékk enga fjárhagslega sérmeðferð á unglingsárum þrátt fyrir að vera sonur eins ríkasta pars heims, David og Victoriu Beckham.
Brooklyn, sem fæddist árið 1999, ólst upp í London, Madríd og Los Angeles á meðan faðir hans lék með Real Madrid og LA Galaxy. Þrátt fyrir forréttindin vildu foreldrar hans að hann yrði jarðbundinn og hann þurfti að vinna fyrir eigin peningum. Aðeins 15 ára gamall vann hann vaktir á kaffihúsi í vestur-London og þénaði 2,68 pund á tímann.
Í dag er Brooklyn 26 ára og hefur fjarlægst fjölskyldu sína í kjölfar ágreinings. Hann hefur rofið samskipti, blokkað fjölskyldumeðlimi á samfélagsmiðlum og sent lögfræðibréf þar sem hann fer fram á að fá frið, að sögn til að vernda andlega heilsu sína. Hann mætti hvorki í 50 ára afmæli föður síns né aðra stóra fjölskylduviðburði.
Brooklyn er giftur leikkonunni Nicola Peltz, sem er sögð mun ríkari en hann sjálfur. Samkvæmt Celebrity Net Worth eru eignir Brooklyn metnar á um 7,4 milljónir punda, aðallega vegna fyrirsætustarfa og vörumerkjasamninga.
