Jack Wilshere hefur lagt knattspyrnuskóna á hilluna, 30 ára gamall.
Wilshere er þekktastur fyrir tíma sinn hjá Arsenal, félaginu sem ól hann upp. Hann lék einnig fyrir félög á borð við Bournemouth, West Ham og nú síðast AGF í Danmörku.
„Þetta hefur verið ótrúlegt ferðalag, fullt af svo mörgum frábærum augnablikum. Það hafa verið forréttindi að upplifa allt sem ég hef upplifað á ferlinum,“ segir meðal annars í færslu Wilshere á Instagram.
„Í sannleika sagt hefur verið erfitt að sjá ferilinn renna mér úr greipum undanfarið vegna ástæðna sem ég ræð ekki. Á sama tíma finnst mér ég eiga svo mikið inni.“
„Eftir að hafa talað við þá sem standa mér næst veit ég að þetta er rétti tíminn og þrátt fyrir erfiðar stundir inn á milli lít ég stoltur til baka á ferilinn minn.“
Wilshere vann þrjá bikarmeistaratitla á tíma sínum hjá Arsenal. Hann yfirgaf félagið árið 2018.
Hann þótti á sínum tíma gríðarlegt efni en náði aldrei að verða sá leikmaður sem margir bjuggust við. Miðjumaðurinn átti þó góðar rispur inn á milli.
Wilshere fer yfir víðan völl í yfirlýsingunni á Instagram. Hana má lesa í heild hér að neðan.
I’ve lived my dream. Thank you all ❤️ pic.twitter.com/rB5gnyyUlK
— Jack Wilshere (@JackWilshere) July 8, 2022
The Athletic segir að Wilshere muni nú snúa aftur til Arsenal sem þjálfari U-18 ára liðsins.
