Tottenham Hotspur hefur áhuga á að ganga frá kaupum á miðjumanninum Conor Gallagher frá Atletico Madrid, samkvæmt miðlum í London.

Á sama tíma er greint frá því að miðjumaður Spurs, Rodrigo Bentancur, verði frá keppni í að minnsta kosti þrjá mánuði vegna meiðsla aftan í læri. Bentancur meiddist í tapi Tottenham gegn Bournemouth í síðustu viku og talið er að hann þurfi að gangast undir aðgerð.

Meiðsli Bentancur, ásamt fjarveru Lucas Bergvall, hafa gert það að forgangsmáli hjá Spurs að styrkja miðjuna í janúarglugganum. Tottenham hefur lengi horft á Gallagher og er sagður hafa aukið áhuga sinn undanfarið.

Sky Sports News greinir jafnframt frá því að Aston Villa sé einnig að kanna möguleika á að semja við Gallagher.

Atletico Madrid er þó ekki tilbúið að lána leikmanninn nema samningurinn feli í sér kaup, og félagið vill fá upphæð sem er nálægt þeim 38 milljónum punda sem það greiddi Chelsea fyrir hann sumarið 2024.