Manchester United segir að Cristiano Ronaldo sé ekki til sölu, þrátt fyrir fréttir síðustu daga.

Framtíð Ronaldo er í lausu lofti og héldu enskir miðlar því fram í morgun að Man Utd væri búið að sætta sig við að Ronaldo væri á förum.

Yfirlýsing félagsins hljóðar hins vegar öðruvísi. „Öfugt við það sem er haldið fram í fjölmiðlum hefur staða okkar ekki breyst gagnvart Ronaldo. Hann á ár eftir af samningi sínum og er ekki til sölu,“ segir í henni.

Ronaldo sneri aftur til Man Utd í fyrra, tólf árum eftir að hann yfirgaf félagið fyrir Real Madrid.

Sjálfur átti Portúgalinn fínasta tímabil en liðið olli hins vegar vonbrigðum og hafnaði í sjötta sæti. Það þýðir að Man Utd mun leika í Evrópudeildinni á næstu leiktíð, eitthvað sem Ronaldo getur ekki hugsað sér en hann ætlar að spila með liði í Meistaradeild Evrópu.

Ronaldo hefur ekki mætt til æfinga eftir sumarfrí og er ólíklegt að hann fari með Man Utd í æfingaferð. Haldið verður utan á föstudag.

Ronaldo hefur hvað mest verið orðaður við Chelsea. Þá hafa Bayern Munchen og Napoli einnig verið nefnd til sögunnar. Öll félögin leika í Meistaradeildinni.