Jeremiah „Jerry“ Harris hefur verið dæmdur í tólf ára fangelsi í Bandaríkjunum fyrir kynferðisbrot og vörslu barnaníðsefnis. E! News greinir frá.
Jeremiah kom fram í geysivinsælu þáttunum Cheer á Netflix. Þættirnir eru heimildaþættir um klappstýrulið í Texas og varð Jeremiah mjög vinsæll karakter eftir fyrstu þáttaröð. Hann til að mynda tók viðtöl við stjörnurnar á rauða dreglinum á Óskarsverðlaunahátíðinni í febrúar 2020.
Frægðarsól hans skein því hátt þegar hann var svo handtekinn í Chicaco í september 2020. Hann hefur sætt gæsluvarðhaldi síðan.
Jeremiah átti yfir höfði sér allt að 50 ára fangelsi en ákæruvaldið í Bandaríkjunum samþykkti að fella niður nokkra ákæruliði gegn því að hann játaði að hann hefði brotið alríkislög með því að ferðast yfir ríkismörk til að stunda ólöglegt athæfi og að hann hefði tekið á móti barnaklámi. Í gær var hann dæmdur til 12 ára fangelsisvistar í alríkisfangelsi.
Í upphafi voru ákæruliðirnir samtals sjö, en fimm voru felldir við játninguna. Brotin tengdust fjórum drengjum undir lögaldri og áttu sér stað á árunum 2017 til 2020.
Saksóknarar sögðu Jeremiah hafa „ítrekað beðið um kynferðislegar myndir og myndbönd“ frá tvíburabræðrum, sem voru þá 13 ára, og reyndi tvisvar að eiga í kynferðislegu athæfi við annan þeirra á klappstýruviðburði árið 2019.
Brotin sem Jeremiah játaði voru að hafa greitt fyrir nektarmyndir frá sautján ára dreng og að ferðast yfir ríkismörk – til Flórída – til að misnota fimmtán ára dreng. Saksóknarar sögðu hann einnig hafa játað að hafa bæði sent og tekið á móti nektarmyndum frá tíu til fimmtán öðrum börnum.
Vice fjallaði um málið í maí, hægt er að horfa á umfjöllun þeirra hér að neðan.