Arnari Grant hefur verið sagt upp hjá líkamsræktarstöðinni World Class en Arnar var með verktakasamning við stöðina. Björn Leifsson, eigandi World Class, staðfesti þetta í samtali við Vísi sem greindi fyrst frá uppsögninni.
Ástæðan fyrir uppsögninni er sú að Ari Edwald, Hreggviður Jónsson og Þórður Már Jóhannesson kærðu Arnar, sem og Vítalíu Lazareva, til héraðssaksóknara fyrir tilraun til fjárkúgunar.
Björn segir í samtali sínu við Vísi að það sé regla hjá líkamsræktarstöðinni að hafa ekki fólk í vinnu sem er í miðju kæruferli því það sé ekki hægt að láta fyrirtækið „dragast inn í þetta.“
Lesa meira: „Fráleit tilraun til að afvegaleiða umræðuna“ segir Arnar Grant um kæruna
Kæran á rætur sínar að rekja til uppákomu í sumarbústaðarferð í Skorradal árið 2020. Þar voru þremenningarnir að skemmta sér ásamt og Þorsteini M. Jónssyni og Arnari. Sá síðastnefndi bauð Vítalíu í heimsókn eftir miðnætti þegar ölvun var orðin talsverð en þá hafði Þorsteinn yfirgefið staðinn.
Ári síðar, 28. október í fyrra, fengu þremenningarnir skilaboð frá Vítalíu þess efnis að hún ætlaði að leita réttar síns vegna meintra brota þremenninganna gegn henni. Daginn eftir birti hún svo færslu á Instagram þar sem hún sakaði þremenninganna ásamt Arnari um að hafa brotið á sér kynferðislega í pottinum. Sú færsla var síðan tekin niður samdægurs.
Lesa meira: Vítalía biðst afsökunar á að hafa brugðist öðrum þolendum
