Nasser Al-Khelaifi, forseti Paris Saint-Germain, segir peninga ekki hafa haft úrslitaáhrif í því að Kylian Mbappe hafi ákveðið að vera áfram hjá félaginu.
Mbappe var sterklega orðaður við Real Madrid en snemma í sumar gerði PSG hann að launahæsta leikmanni heims.
Með nýjum þriggja ára samningi þénar Mbappe um milljón punda á viku. Það eru tæpar 165 milljónir íslenskra króna.
Þá fær hann það sem jafngildir um 16,5 milljörðum króna fyrir það eitt að skrifa undir. Frakkinn fær þá bónusgreiðslur fyrir skoruð mörk, vinnur Meistaradeildina eða ef hann hlýtur Ballon d’Or verðlaunin.
Auk þess sem nefnt er að ofan fær Frakkinn ungi ákveðin völd innan félagsins og fær að hafa áhrif á ákvarðanir félagsins.
„Ég hafnaði tilboði (frá Real Madrid) upp á 180 milljónir evra síðasta sumar því ég vildi að Kylian vildi vera áfram hjá PSG. Ég þekki hann vel. Ég veit hvað hann og hans fjölskylda vill. Peningar hafa ekki áhrif á þau,“ sagði Al-Khelaifi.
„Hann var valinn til að spila hér, fyrir borgina sína, félag sitt og þjóð sína, einnig fyrir verkefnið.“