Suðurkóreska þáttaröðin Squid Game sló svo sannarlega í gegn hjá Netflix og varð „stærsta sjónvarpsþáttaröð“ efnisveitunnar. Nú hefur verið ákveðið að búa til raunveruleikaþætti sem byggjast á sömu hugmynd og munu 456 manns keppa í þeim. Einn mun standa uppi sem sigurvegari en verðlaunin eru ekki af verri endanum eða sem svarar til um 590 milljóna íslenskra króna.

Í Squid Game er fylgst með 456 manns, sem allir glíma við mikil fjárhagsvandræði, sem leggja líf sitt að veði í banvænum útgáfum af þekktum barnaleikjum. Mörg atriði í þáttunum þykja ansi grimmdarleg en þau sýna örvæntingarfullt fólk berjast upp á líf og dauða til að standa uppi sem sigurvegari.

En það verður ekki gengið svo langt í raunveruleikaþáttunum, fólk sleppur lifandi frá þeim!

Þátttakendurnir munu taka þátt í fjölda leikja eins í þáttaröðinni en erfiðasta verkefni þeirra verður kannski að velja hvaða taktík þeir vilja beita, mynda bandalög með öðrum þátttakendum og láta reyna á þau á meðan þátttakendur falla úr leik einn af öðrum.

„Það er mikið að veði en í þessum leik en versta niðurstaðan er að fara tómhentur heim!“ segir í tilkynningu Netflix um þessa nýju raunveruleikaþætti. 10 þættir verða gerðir.

Aldrei fyrr hafa svo margir tekið þátt í raunveruleikaþætti og aldrei fyrr hafa verðlaunin verið svona há að sögn Sky News.